توسيعة خاطر
الجار ومرت جاره
كان فيه راجل يحكي علي موقف صايرله زمان قال زمان البيوت كلها مصنوعة من الطين وتشبه بعضها هلبة وقريبة من بعض ونفس اللون وفي يوم من الايام قال لمرته اليوم رهو بيجوني ضيوف علي العشاء بعد صلاة المغرب نبي كل شيء واتي قبل مايوصلوا الضيوف وجابلها اللي لازمها وما نقص عليها حاجه ومشي للمزرعة متاعه بيجيب حاجات لازمينه ورجع آذان المغرب والدنيا كيف بادية اظلم وخش للحوش لقي مرته راقدة وتنخط ومتغطية ببطانية وزمان كانت الحياش لا كهرباء ولا لمبات الحوش كله مظلم ممكن فيه شوية ضي في السقيفه وقال هكي حول السبتة متاعه وبدي في هديكا المراء ضرب ماخلا مكان بالسبتة تاك اعطيه لين ايده فشلت قريب قتلها وطلعت منه وهربت في الشارع بين الحياش تجري وتعيط ومش قادره تشبح وارها لما طلع راجلها في جرتها بيكمل عقاب الضرب فاق بروحه ان الحوش اللي خشله مش حوشه حوش جاره اللي في جنبه وهو خشله بالغلط والمراء اللي ضربها طريحة هي مرت جاره
الراجل انصدم وقريب مات خاف من اللي داره ومشي يجري وخش لحوشه لقي مرته مجهزتله كل شيء لعشي ضيوفه وتستنى فيه
وجو الضيوف وضيفهم وهو مخنوق ومضايق يخمم في المصيبة اللي دارها وشن بيقول لجاره وروحوا الضيوف وقعد ثلاثة ايام ماطلعش من حوشه يخمم ويستنى في جاره يشكي فيه ولا يجي يعطيه طريحة باهية لكن فاتو ثلاثة ايام والجار لا جي ولا شكي
رابع يوم الراجل طلع من حوشه وخطم علي سوق الذهب وشري خناق ذهب ومشي لجاره وطقطق عليه الباب وفتحله الجار وحكاله اللي صار وقاله سامحني وقول لمرتك تسامحني وحكاله القصة كلها
قاله جاره اني انقووووول انا ليا ثلاثة ايام مستغرب نشوف في المراء ولت فالحة وزي الطقاشة ناشطة والحوش زي الجنة من النظافة وكل غدي احلى من الثاني توا عرفت علاش .
بالله عليك ياجاري تعال كل اسبوع واعطيها طريحة زي طريحتك الاولى ..
طلعت المراء ماعرفتش ان جارها هو اللي ضربها ماهي الدنيا ظلام ومدهشرها النوم ماشافتش منو اللي يضرب تحسابه راجلها بيربيها وتعيط وخلاص وهربت في الشارع .
قاله جاره الخناق اللي شريته ارفعه لمرتك اللي ستراتك قدام ضيوفك هي اللي تستاهله ..
الادمن فوزي ابوسيف
